艾摩廉親自點名　烏加迪有運行

魯賓艾摩廉聽日就過檔曼聯接掌帥印，有葡萄牙傳媒問佢，就快同曼聯新兵曼紐爾烏加迪重聚睇法，艾摩廉大讚烏加迪好有天賦，好高興喺曼聯見番佢。

曼紐爾烏加迪於2021至23年效力士砵亭兩個球季，當年佢由法馬利卡奧來投，轉會費650萬歐元，正係由艾摩廉引入，兩季共上陣85場入1球，協助球隊贏得葡聯盃。

2023年6月，巴黎聖日耳門觸發6,000萬歐元解約金簽入烏加迪，該季上陣37場，贏得法甲同法足盃，今季以4,200萬鎊獲曼聯承接，依家艾摩廉亦跳槽執教曼聯，兜一個大圈之後兩師徒再度重聚。

對於重遇烏加迪，艾摩廉表示：「我執教過嘅所有烏拉圭球員都非常出色，呢個亦係我鍾意佢哋嘅原因，烏加迪係個好有天賦嘅小子，仲有好大成長空間，好開心喺曼聯見番佢。」

烏加迪喺曼聯並非常規主力，至今上陣10次，不過艾摩廉已經嚟到，仲親口點名烏加迪係「自己人」，預期將會成為艾摩廉體系嘅骨幹之一。