韋斯咸召開危機會議　盧比迪古帥位危

韋斯咸上場英超主場0比0悶和愛華頓，依家沉淪聯賽榜第14位，據英國《泰晤士報》消息，班主大衞蘇利雲今個星期將召開危機會議，西班牙領隊盧比迪古帥位岌岌可危。

盧比迪古今個夏天代替莫耶斯執教，季前雖然動用超過1億鎊簽入富克洛、卡路士蘇拿等球星，但成績不進反退，而且未有改善迹象。《泰晤士報》報道，大衞蘇利雲今個星期會同總監施泰頓等人開會，決定係咪繼續用盧比迪古執教。

58歲嘅盧比迪古喺對愛華頓後表示：「我習慣喺壓力下工作，呢件唔係咩新鮮事。我好滿意球員嘅態度、好滿意球會嘅環境，只係對排名同成績唔滿意，但我好肯定韋斯咸可以向上爬。」據報如果韋斯咸炒盧比迪古，前車路士領隊樸達會係新帥候選人之一。