捧盃命！前車路士名將執教一個月奪冠

周一凌晨（11日）嘅巴西盃決賽次回合，法林明高1比0擊敗明尼路，兩回合合計贏4比1順利奪冠，亦係前車路士功勳球員菲臘路爾斯執教球隊一個多月，就帶領球隊捧盃而回，成為美談。

菲臘路爾斯係車路士2014至15年球季英超冠軍成員，佢效力車路士一季就捧英超同英聯盃，而佢生涯大部分時間都效力馬體會，共兩奪歐霸盃及歐超盃，仲有西甲同西班牙盃各一次，返回巴西效力法林明高，捧盃次數就更多，包括巴甲、巴超盃、自由盃各兩次，巴西國家隊亦捧過洲際盃同美洲盃各一次，直至去年12月在法林明高宣布掛靴。

39歲嘅菲臘路爾斯掛靴後出任法林明高U20教頭，展開教練工作，法林明高9月宣布辭退迪迪，結果就搵咗菲臘路爾斯接手，雖然佢執教經驗尚淺，但就得到球員尊重，就好似近期喺曼聯做看守領隊嘅雲尼斯達萊，球隊愈踢愈好，卒之依家仲捧埋盃添。