英超球證公然侮辱利物浦　影片曝光被即時停職

英超球證執法水平備受質疑，而且經常被指偏私或針對某支球隊，喺英超已執法6年嘅著名球證大衞古特，近日就有影片喺網上瘋傳，影片中大衞古特公然侮辱利物浦，講出「利物浦係狗屎」，又鬧利物浦前領隊高普係「德國X佬」，大衞古特已被即時停職。

據報網上流出嘅影片係攝於2020年7月，利物浦主場1比1打和般尼後，當時領隊高普曾不滿判決，大鬧執法球證大衞古特。喺由手機拍攝嘅影片中，大衞古特被問到點睇利物浦表現，佢就回應「利物浦係狗屎」，之後講到對高普嘅評價，大衞古特更炮轟：「佢話我講大話又鬧X我，我冇興趣同咁X自大嘅人對話......個德國X佬，X佢！」

大衞古特侮辱利物浦片段：https://twitter.com/i/status/1855968991119872392　

目前仍未知影片嘅虛實，不過英國職業裁判員公司(PGMOL)立即採取行動，宣布大衞古特暫時停職並進行調查。利物浦上場聯賽2比0贏阿士東維拉，執法球證就係大衞古特。