搞邊科？英格蘭8球員宣布退隊　緊急補選5將

英格蘭將會喺歐國聯對希臘同愛爾蘭，亦係看守領隊卡斯利領軍最後2場，不過一眾球星「唔畀面」，足總周二(12日)宣布8名入選國腳稱傷退隊，卡斯利要一口氣補選5名球員應急，陣容大執位。

英超鬥得如火如荼，「太公波」自然避得就避，英格蘭足總宣布，高爾彭馬、菲爾科頓、布卡約沙卡、阿歷山大阿諾特、迪格蘭賴斯、基亞利殊、蘭斯達爾同利維高維爾都因傷退隊。

面對嚴重退隊潮，卡斯利隨即補時5名球員入隊，包括阿士東維拉中場摩根羅渣士首度入選，仍未有喼帽嘅利夫拿文度同占士查科特都獲垂青，另兩人係查洛保雲同班夫韋迪。

英格蘭目前喺歐國聯B2組排第2位，落後榜首希臘3分，周五(15日)凌晨作客希臘係升班關鍵戰，卡斯利教埋呢2場比賽後，德國領隊杜曹將會接手。