曼聯又買「車手」　冬季增兵睇中尼干古

魯賓艾摩廉成為曼聯新帥之後，會方準備冬季轉會市場重開後再度增兵，提升實力，根據英國《太陽報》爆料，紅魔鬼睇中車路士進攻中場尼干古，加上車仔打算出售呢位27歲法國國腳，雙方有望達成交易。

曼聯今季新簽前鋒約舒亞舒克斯表現令人失望，加上拉舒福特狀態持續低迷，會方認為有必要再簽進攻球員，提升入波能力，尼干古成為首選，皆因佢技術全面，可以勝任前鋒、翼鋒、進攻中場，有助新帥魯賓艾摩廉靈活調動。加上尼干古入球效率甚高，今季各項賽事上陣16場入10球，正係曼聯最需要嘅射手。

與此同時，車路士有人滿之患，尼干古對於缺乏上陣機會，感到意興闌珊，早前已經傳出佢有意離隊，紅魔鬼正好乘虛而入，簽入佢比收購其他球星容易。車路士上年夏天用5,200萬鎊(約5.2億港元)向RB萊比錫收購尼干古，相信唔會以低於呢個價錢出售佢。

曼聯上年夏天收購車路士中場美臣蒙特，但呢位英格蘭國腳經常受傷，尼干古亦屬於「玻璃腳」，難怪唔少網民認為紅魔鬼仲未吸取教訓。