利辛度又受傷　無緣2場世盃外

曼聯中堅利辛度馬天尼斯有份入選阿根廷大軍名單，但最新消息指呢位26歲後衞受到傷患困擾，無法出戰嚟緊2場世界盃外圍賽，領隊史卡朗尼已經補選朗斯中堅梅迪拿填補位置。

阿根廷足總透過社交網公布，利辛度馬天尼斯經過檢查之後，發現佢膝部有傷，唔可以參加11月15日早上世界盃外圍賽作客巴拉圭，以及5日之後主場對秘魯。與此同時，梅迪拿獲補選入國家隊，呢位25歲守將同利辛度馬天尼斯一樣，可以勝任中堅同左後衞，佢之前曾經3次為阿根廷上陣。

阿根廷現時排世盃外南美洲區榜首，領先第2位哥倫比亞3分，南美洲區前6隊可以直接晉級世界盃決賽周，阿根廷出線機會高唱入雲，即使缺少利辛度馬天尼斯，影響亦唔大。