阿根廷輸波　美斯躁爆狂鬧球證

周五(15日)早上世界盃外圍賽南美洲區爆大冷，衞冕嘅阿根廷領先之下，竟然倒輸，作客以1比2不敵巴拉圭，球王美斯罕有踢到躁爆，半場結束時指住球證追罵，隨時有手尾跟。

阿根廷原本有好開局，開賽11分鐘就由拿達路馬天尼斯入波打開紀錄，但僅過8分鐘，巴拉圭靠前鋒東尼沙拿比亞以倒掛金勾射入扳平。

美斯今場遭對手嚴密防守，包括被奧馬阿達雷迪2次粗野侵犯，半場結束時，呢位37歲射手立即向球證作出激烈投訴，並且手指指，不滿球證冇向奧馬阿達雷迪出示紅牌。

換邊後冇耐，阿根廷再受打擊，奧馬阿達雷迪接應罰球頂入，協助巴拉圭反超前，呢位效力基達菲嘅中堅，今仗成為美斯「大剋星」。

阿根廷原本有機會扳平，但迪保羅單刀射高，導致全失3分，近3場世盃外作客只有1和2負，但仍然排榜首，領先踢少1場嘅第2位哥倫比亞3分。