夏蘭特「戴帽」率挪威升班　膺歐國聯士哥王

挪威周一(18日)凌晨喺歐國聯B3組，主場5比0大炒哈薩克，由於原本榜首嘅奧地利被斯洛文尼亞逼和1比1，令挪威戲劇性搶走首名，下屆將升上A級聯賽角逐。挪威贏波英雄又係艾寧夏蘭特，佢今場連中三元，穩佔歐國聯史上「士哥王」寶座。

挪威今場清風送爽，夏蘭特上半場1腳1頭已入兩粒，加上阿歷山大索洛夫入波，半場領先3比0。71分鐘夏蘭特禁區邊抽入上演帽子戲法，亦係佢歷來第4次喺挪威國家隊「戴帽」，小將紐沙76分鐘錦上添花，為挪威取得5比0大勝，並以2分壓倒奧地利，以小組首名升班。

夏蘭特今屆歐國聯已入7球，歷來累積19個入波，係歐國聯成立後入波最多球員，拋離阿歷山大米祖域(15球)、C朗拿度(12球)等射手。