阿仙奴再中FIFA病毒　杜沙特傷出比利時輸波

阿仙奴再受「FIFA病毒」襲擊！周一(18日)凌晨歐國聯A2組，比利時作客0比1輸畀以色列，中場李安度杜沙特喺上半場勇戰受傷，要提早退下火線，成為阿仙奴近3個國際賽期第5個受傷球員。

比利時今場殘陣出戰，37分鐘更有杜沙特受傷，佢行出場嗰陣一拐一拐，暫時未知傷勢程度。比利時攻極唔入，完場前4分鐘更被主隊嘅舒亞入波，最後慘輸0比1，將要出戰護級附加賽。

比利時領隊泰迪斯高賽後表示：「今場有好多問題，賽前已經有唔少傷兵，杜沙特喺上半場又傷埋，今仗踢得唔好，個環境實在太差。」

阿仙奴喺9月份國際賽，有卡拉科利同馬田奧迪加特受傷，10月份國際賽就有布卡約沙卡同加比爾馬天尼利負傷而回，今輪國際賽又到杜沙特「出事」，認真黑仔。