東網電視
更多新聞短片
曼聯女足「奇招」擾敵。
周日(17日)女子英超出現罕見一幕，曼聯女足作客2比0擊敗李斯特城女足一仗，「紅魔女」喺一次罰球攻勢入面，派出兩個球員企喺對方門將面前騷擾，阻礙對方安排人牆，唔少球迷都話戰術非常「小學雞」。
記者Ian Stringer喺社交網上載「事發影片」，留言：「點睇？我睇波從來未見過，公平？冇體育精神？」影片中曼聯嘅Millie Turner同Elisabeth Terland喺罰球嗰陣，走到李斯特城門將前面高舉雙手，企圖阻礙同遮擋對方安排人牆嘅視線，球證見到就叫佢哋走開，不過兩人就提出抗議，話自己並冇觸碰對手，不過最後兩人都「撤退」，而罰球攻勢亦無功而還。
曼聯女足教練史堅拿賽後表示：「李斯特城個龍門好高大，所以我哋嘗試阻擋佢嘅視線，呢個係死球教練諗出嚟，而且係容許咁做。我唔知球證點諗，但如果佢(球證)話唔可以，咁就唔做囉！」
