東網電視
更多新聞短片
杜格拉斯雷斯喺意甲發展未如人意。(Getty Images)
據意大利《都靈體育報》報道，祖雲達斯同曼聯正蘊釀驚天交易，祖記想用巴西中場杜格拉斯雷斯，交換曼聯嘅前鋒約舒亞舒克斯，兩位今個夏天先至轉會嘅新兵，都未得到重用，各取所需未嘗唔係光明出路。
祖雲達斯對荷蘭前鋒約舒亞舒克斯青睞已久，呢位前博洛尼亞球員喺曼聯新帥魯賓艾摩廉手下，已淪為前鋒第3號人選，不過祖記未必可以負擔高昂轉會費，所以提出用杜格拉斯雷斯作為交換。杜格拉斯雷斯季前以4,230萬鎊轉會費由阿士東維拉加盟，但教練莫達認為佢體能狀況、訓練態度都有問題，今季只踢過2次正選，踢走係遲早問題。
事實上，26歲嘅杜格拉斯雷斯過去5季效力維拉表現極佳，被譽為英超最佳防守中場之一，硬朗防守同用波能力都好適合艾摩廉嘅3-4-3戰術，頂替老將卡斯米路最適合不過。
