東網電視
更多新聞短片
沙拿今季喺利物浦單天保至尊。(Getty Images)
利物浦今季喺施洛領導下氣勢如虹，穆罕默德沙拿亦狀態巔峰，不過喺呢個輝煌時刻，沙拿竟喺訪問投下「離隊震撼彈」，被指借輿論壓力為續約談判向利物浦施壓，「紅軍」名宿加歷查就睇唔過眼，炮轟沙拿行為自私。
今季英超已入10球嘅沙拿，同利物浦合約明年夏天結束，但佢目前周薪高達35萬鎊，雙方續約條件仍未傾掂，沙拿發表「離隊機會多過留隊」宣言，明顯係借球迷同傳媒向利物浦施壓。除沙拿之外，華基爾雲迪積克同阿歷山大阿諾特，都會喺明年回復自由身。
加歷查對沙拿行為非常不滿：「利物浦同沙拿當然有傾續約，但條件上有明顯落差，所以利物浦仲未開出新約，係因為條件仲傾緊，未傾完就開出合約然後被拒絕，有乜意思？我相信佢哋最後會喺中間位達成共識，不過我對沙拿嘅行為好失望，點解要喺對皇馬同曼城之前做呢個訪問？佢同佢經理人繼續玩呢啲把戲就係自私，將自己利益擺喺球會之上。」
