東網電視
更多新聞短片
基利靴能力足以喺任何球隊做正選。(Getty Images)
利物浦今季橫掃英超同歐聯，所有球員都有超水準發揮，後備門將基利靴就係最佳「人辦」，佢喺艾利臣比加受傷後完美頂上，歐聯對皇家馬德里勇救基利安麥巴比12碼，更加係佢近4場比賽第3次救出極刑，不過呢位愛爾蘭國腳預期好快又要返入冷宮，甚至未來兩個轉會窗離隊，利物浦真係「暴殄天物」。
基利靴今季臨危受命踢咗9場，幫利物浦拎到8勝1和佳績，計埋為愛爾蘭踢歐國聯，佢近4場比賽先後喺對芬蘭、修咸頓同皇馬救出12碼。基利靴賽後表示：「我好少會望操刀嘅球員，我對自己好有信心，近排我已經救過2次12碼，好幸運今次又救到，今場勝利非常重要。」
26歲嘅基利靴表現愈好，球迷就愈覺得心痛，據報巴西門將艾利臣比加傷愈，下場可以復出，基利靴好可能要返去後備席，而且利物浦今夏已經用高價簽入華倫西亞門將馬馬達舒維利，下季就會加盟，明顯係艾利臣接班人，基利靴季前已講明要離隊尋求正選，預料最遲明年夏天就會走人。
