東網電視
更多新聞短片
馬歷堤曼係燕豪芬最大功臣。(Getty Images)
歐聯連續2日上演「荷蘭式奇迹」，繼飛燕諾喺最後15分鐘連入3球逼和曼城後，燕豪芬周四(28日)凌晨迎戰薩克達，喺87分鐘仍落後0比2下，計埋補時喺8分鐘內入3球奇迹反勝，荷蘭神奇！
燕豪芬今場佔盡優勢，全場有超誇張嘅35次攻門，估唔到上半場竟然落後0比2。薩克達69分鐘有柏迪連奴領紅踢少個，燕豪芬攻勢更盛，去到87分鐘由馬歷堤曼入波揭開反擊序幕，呢位前鋒3分鐘後離門30碼轟入世界波追平。補時5分鐘最後一擊，列卡度柏比門前混戰射入，燕豪芬短短8分鐘內連入3球反勝3比2。
Opta數據顯示，燕豪芬成為歐聯喺1992年改制後，第1支喺87分鐘落後2球，最終法定時間內贏波球隊。燕豪芬喺歐聯2連勝後升上第18位，佢哋最後3輪對手係比斯特、貝爾格萊德紅星同利物浦。
