【有片】寶刀未老　44歲朗拿甸奴射入靚罰球

去片睇朗拿甸奴射入靚罰球

https://x.com/i/status/1862181777030119486　

卡塔爾日前舉行1場元老版西班牙「國家打吡」，皇馬傳奇隊對巴塞隆拿傳奇隊，44歲嘅「細哨」朗拿甸奴寶刀未老，射入靚罰球，成為網上熱話。

今場傳奇賽星光熠熠，有朗拿甸奴、費高、施多夫等多位退役名將參加，踢到15分鐘，巴塞隆拿傳奇隊離門約25碼獲得罰球，鬍鬚斑白嘅朗拿甸奴冇助跑，直接起腳射入，功架十足，令已年屆66歲嘅皇馬傳奇隊門將拜約得個睇字。

「細哨」嘅精彩罰球入波片段喺網上瘋傳，網民大讚佢技術並冇退步，射術仲好過唔少當打球員，慨嘆巴西現時已經冇朗拿甸奴呢種超級巨星。

雖然巴塞隆拿傳奇隊憑朗拿甸奴射入罰球領先2比0，但皇馬傳奇隊最後都追和2比2，和氣收場，費高亦有入球進帳。