朗尼又有帥位危機　得番兩場機會

前曼聯射手朗尼今季再執教鞭，出任英冠普利茅夫領隊，結果輸多贏少，上場淨吞布里斯托城4蛋後，帥位危機再現，據報佢得番兩場續命機會，嚟緊連續兩次主場出擊，分別對牛津聯同史雲斯，如果再攞唔到分，「月巴」隨時執包袱。

朗尼掛靴後，2020年開始執起教鞭，首支球隊英冠打比郡本來教得唔錯，可惜球會出現財政問題被扣21分，更被頒轉會禁令，最終降班收場，之後佢轉戰美職執教華盛頓聯，一年半後重返英倫，執教英冠伯明翰，但球隊表現急跌，由原本爭標變護級，結果季中被炒。

朗尼今夏復出執教普利茅夫，球隊本身實力中下，朗尼帶領下亦冇乜起色，近期連場大敗，包括1比6輸畀諾域治，上場又以0比4敗於布里斯托城，朗尼本人亦形容為「執教生涯最艱難嘅一星期」，球隊現時排尾4，就快跌入降班區，今次帥位危機朗尼仲有咩辦法？