東網電視
更多新聞短片
哥迪奧拿用行動粉碎同奇雲迪布尼不和傳聞。(Getty Images)
經歷英超4連敗後，曼城周四(5日)凌晨谷底反彈，主場3比0大破諾定咸森林，「藍月亮」贏波功臣係復任正選嘅奇雲迪布尼，呢位比利時中場交出1入波1助攻，尾段換出後哥迪奧拿都攬住佢嚟錫，粉碎將帥不和嘅傳聞。
奇雲迪布尼近幾場都係比賽尾段先入替，令加歷臣、加利尼維利等名宿質疑佢同哥迪奧拿鬧不和，哥帥喺賽前記者會已強烈反駁，今場更派呢位中場相隔2個半月後首次正選上陣。奇雲迪布尼不負眾望，8分鐘就助攻貝拿度施華入波，31分鐘更喺禁區內輕鬆射入。曼城下半場早段再由謝利美杜古建功，大局已定下，奇雲迪布尼74分鐘退下火線，哥帥即場攬住佢錫。
哥迪奧拿賽後表示：「好開心奇雲迪布尼回歸，佢踢咗神奇嘅75分鐘，佢係個好可愛、多年來對球隊極度重要嘅人，佢值得擁有最好嘅嘢。」奇雲迪布尼就話：「我同哥迪奧拿從來都冇問題，佢知道我嘅傷勢好麻煩，希望我嘅身體會愈嚟愈好。」
