東網電視
更多新聞短片
麥巴比今場錯失多次機會。(Getty Images)
法國前鋒基利安麥巴比今夏強勢轉會皇家馬德里，原本以為可以令「銀河艦隊」更上層樓，不過季初「災難級」表現反成負累，周四(5日)凌晨西甲再次射失12碼，令皇馬作客1比2慘負畢爾包，麥巴比賽後亦公開認錯。
皇馬今場作客畢爾包表現差勁，53分鐘被阿歷斯比倫古亞攻陷先落後，隨後魯迪格為皇馬博到12碼，但麥巴比主射被對方門將救出，繼上星期歐聯輸畀利物浦12碼宴客後，1星期內第2次射失12碼。皇馬78分鐘一度由祖迪比寧咸追和，點知2分鐘後又被高卡古魯斯達單刀得手，最終1比2輸波而回。
麥巴比今場射失12碼之外，亦曾面對大半個空門射出軟弱無力一腳被接實，統計顯示佢今季喺西甲已錯失13次黃金機會，係唯一一個失機超過10次嘅球員。麥巴比賽後喺社交網表示：「差勁嘅戰果，今仗由細節決定成敗，我出現一個好重大嘅錯誤，需要負上全部責任。依家係困難時刻，但亦都係改變現狀嘅好機會，我要展示出自己真正實力。 」
