拉舒福特打回原形？堅尼怒批「垃圾」

曼聯喺魯賓艾摩廉上任後，多位球員都有「翻生」演出，其中拉舒福特喺頭3場比賽入3球，令球迷相信佢可以重振雄風，不過作客0比2輸畀阿仙奴一仗，「福仔」後備上陣全無表現，而且仲間接累球隊輸第2球，名宿堅尼都忍唔住鬧佢「垃圾」！

拉舒福特上場對愛華頓梅開二度，但今仗意外被貶後備，去到59分鐘先至獲派上陣，可惜佢入場後逼搶、進攻通通欠奉，踢咗超過半個鐘頭只有22次掂波，冇任何射門同關鍵傳送。堅尼嘅網上直播節目入面表示：「曼聯啲後備入嚟之後做過乜？拉舒福特作為一個球員，整體表現係(差到)令人震驚。」

拉舒福特玩波輸角球片段：https://twitter.com/i/status/1864428243610210763　

更加抵鬧嘅係，拉舒福特喺72分鐘返後場防守，喺角球企附近大玩高章波，想挑起個波解圍，點知跣腳撞個波出底線，結果阿仙奴就用角球入到2比0。堅尼當時嬲到爆粗：「簡直係垃圾！佢將個波直接踢出界......真係垃X圾！」