東網電視
更多新聞短片
孫興民將於明夏約滿。(Getty Images)
曼聯近年高價收購球員，往往貨不對辦，加上新股東拉特克利夫設法節省成本，會方計劃將來增兵向自由身球員埋手，根據英國媒體《GIVEMESPORT》爆料，紅魔鬼打算等熱刺前鋒孫興民明夏約滿後，免轉會費簽入佢。
由於孫興民已經32歲，熱刺方面唔想同佢續長約，雙方一直傾唔掂數，呢位南韓國腳可能明夏自由身離隊。曼聯近年欠缺一位可靠射手，「孫仔」為熱刺累積踢313場英超入123球，把握力強，加上已適應英超環境，可以即食，無疑係曼聯最需要嘅人選。
曼聯史上出現過非常成功嘅南韓球員，就係朴智星，呢位中場2005至12年效力紅魔鬼，協助球隊奪標4次英超及1次歐聯冠軍等多項錦標，孫興民可能有興趣行「星仔」舊路成「魔」。
