東網電視
更多新聞短片
巴黎聖日耳門作客只能同歐塞爾打和0比0。
法甲豪門巴黎聖日耳門(PSG)星散之後，吸金能力大減，根據法國傳媒爆料，PSG現時12個主要贊助商之中，有6個開始削減贊助費，令球會今季收入大減，面臨虧損5,000萬歐元(約4.1億港元)。
PSG自2011年獲卡塔爾主權基金入主後，採取「星戰策略」大大提升實力及知名度，但近年無以為繼，特別係基利安麥巴比今夏離隊後，昔日引起為傲嘅「MNM」鋒線美斯、尼馬、麥巴比已完全消失，取而代之係巴特利巴高拿、干卡路拉莫斯、奧士文尼迪比利等缺乏星味嘅球員，自然難以吸引贊助商興趣。
據悉卡塔爾航空、卡塔爾國家銀行、卡塔爾旅遊局等6個主要贊助商開始削減贊助費，仲有2間贊助商取消合作，甚至連球衣贊助商NIKE都打算縮減費用。
除咗贊助費減少之外，由於多位球星走人，導致PSG波衫銷售量下降，比賽入場人數亦減少，令原本連年虧蝕嘅PSG雪上加霜。
屋漏偏逢連夜雨，PSG喺周六(7日)凌晨法甲作客只能同歐塞爾打和0比0，連1.26倍客勝都開唔出，近3場比賽未嘗1勝。
