沙列巴成皇馬收購目標　本尊咁回應

阿仙奴中堅威廉沙列巴表現出色，現時更成為皇馬收購目標，計劃明夏簽入呢位23歲法國國腳，但威廉沙列巴表明無意離隊，對兵工廠一片忠心，主帥阿迪達可以鬆一口氣。

威廉沙列巴被傳媒問到轉會傳聞時，佢話：「我同阿仙奴簽約至2027年，現時只係效力第3季，我喺呢度有家嘅感覺，非常享受一切，包括同隊友及球迷相處。」

威廉沙列巴至今為阿仙奴上陣102場，並有6球進帳，被譽為當今球壇最佳中堅之一，皇馬2位中堅艾達米列達奧、阿拉巴近年經常受傷，因而希望簽入威廉沙列巴，但以目前情況睇，如意算盤應該打唔響。