東網電視
更多新聞短片
奧斯卡杜斯山度士約滿離隊。
前巴西國腳奧斯卡杜斯山度士同上海海港嘅合約屆滿離隊，結束8年中超生涯，盛傳將加盟巴甲球隊國際體育會。內媒為呢位33歲中場做統計，佢8年累積獲得1.92億歐元(約16億港元)薪酬。
奧斯卡杜斯山度士2017年1月以6,000萬歐元轉會費由車路士加盟上海海港，轟動球壇，因為佢當時只係25歲，竟然放棄踢英超，去中超搵食，被指「自毀前途」。事實上，奧斯卡自從加盟上海海港後，就再冇入選巴西國家隊。
不過，奧斯卡獲得豐厚金錢回報，年薪高達2,400萬歐元，高過唔少效力歐洲大球會嘅球星。佢亦交足功課，為上海海港射入77球及141次助攻，捧過3次中超冠軍。
奧斯卡杜斯山度士今季39次披甲有16球進帳及29次助攻，表現仍然出色，重返巴西踢波綽綽有餘，但就賺唔到咁多人工。奧斯卡最大機會加盟隊國際體育會，佢曾於2010至12年效力呢支巴西球隊，其後轉投車路士。
