【官宣】嚴重違紀！英超「醜聞球證」被炒魷

喺英超執法6年嘅著名球證大衞古特，早前爆出「侮辱高普」同「疑似吸毒」影片後被停職，英國職業裁判員公司(PGMOL)周二(9日)正式宣布，大衞古特因嚴重違反紀律，已經被解僱，呢位42歲球證有權提出上訴。

PGMOL發出聲明表示：「喺對大衞古特進行調查後，我哋決定即時同佢解除合約，佢嘅行為嚴重違反合約守則，PGMOL仍然會保障大衞古特嘅權益，佢可以就今次解除合約結果提出上訴。」大衞古特最後1場英超執法，就係上月中利物浦2比0贏阿士東維拉。

上月網上流出2段影片，一段係大衞古特喺4年前私下侮辱當時利物浦領隊係「德國X佬」、「利物浦係狗屎」，另一段就見到佢今夏歐國盃執法期間，喺酒店內吸服疑似係毒品嘅白色粉末。近日再傳出佢5年前曾喺英超賽前「預告」畀黃牌列斯聯球員，惹嚟造波疑雲。