東網電視
更多新聞短片
法蘭基迪莊不做手術、不續約、不轉會。(Getty Images)
巴塞隆拿中場法蘭基迪莊近年備受傷患困擾，即使復出後，發揮亦大不如前，根據西班牙《每日體育報》爆料，巴塞軍醫團隊建議呢位27歲荷蘭國腳接受手術根治傷勢，但佢拒絕，只肯做保守治療，導致勢患遲遲未斷尾，加上唔肯續約，亦冇打算轉會，似足當年烏姆迪迪「躺平」，令巴塞管理層非常頭痕。
法蘭基迪莊今年4月因為右腳足踝受傷，缺陣近半年，復出後一直狀態低迷，已淪為後備，會方希望佢做手術，徹底治愈舊患，但呢位中場卻拒絕，導致雙方關係惡化。據悉巴塞管理層眼見法蘭基迪莊冥頑不靈，計劃出售佢，但佢唔肯離隊，亦唔續約，可能想等2026年夏天自由身走人，對於財政欠佳嘅巴塞，無疑係雪上加霜。
西班牙傳媒指法蘭基迪莊重演烏姆迪迪當年「躺平」情況，呢位前法國國腳都係「三不做」，拒絕做手術、不續約、不轉會，坐定定領取高薪，直至上年夏天先至解約，法蘭基迪莊最終可能亦會同巴塞隆拿不歡而散。
