孫興民搶手　同巴塞土超扯上關係

孫興民上場聯賽對車路士單刀失機累熱刺輸波後，有關「孫仔」明夏約滿離隊傳聞四起，繼上周傳佢去曼聯之後，近日再傳土超加拉塔沙雷同西甲豪門巴塞隆拿都同佢扯上關，認真熱鬧。

32歲嘅孫興民明夏同熱刺約滿，下個月就可以同海外球隊草簽協議，熱刺不得阻止，而現時熱刺嘅態度係只願意同孫仔啟動延長合約1年條款，對於續約就冷處理，加上上場單刀射失，令佢離隊傳聞再起。

西班牙傳媒報道，孫興民願意加盟巴塞隆拿，雙方將進行接觸，巴塞睇中孫興民嘅進攻能力，同埋對開發亞洲市場都有幫助，最重要係免費，雖然同時又傳出加拉塔沙雷對佢有興趣，用佢填補借將域陀奧森漢離隊後嘅中鋒空缺，但一般相信孫仔屬意巴塞。