東網電視
更多新聞短片
利華古遜想簽艾達古拿。(Getty Images)
皇家馬德里想撬走利華古遜主帥沙比阿朗素，連隨簽埋前鋒科利安華迪斯已經傳通天，據報利華古遜近日提出反收購，打算明年1月冬季轉會窗向皇馬收購土耳其新星艾達古拿，皇馬為咗同利華打好關係，多數會應承。
19歲嘅艾達古拿2023年夏天由費倫巴治加盟皇馬，一年半以來坐多過踢，至今僅上陣29場入7球，雖然佢今夏在歐國盃為土耳其上陣有好表現，但皇馬中前場太多人，根本冇佢立足之地，只能繼續坐冷板。
利華古遜搵佢，其實係為科利安華迪斯離隊做準備，而對華迪斯有興趣嘅球隊當中，就有皇馬份，因此利華打算盡早簽入艾達古拿，等佢盡快操起同適應新環境，然後再放華迪斯過檔皇馬。
至於皇馬亦唔會白白放走球員，分析指，皇馬極可能要求艾達古拿轉會利華合約中加入回購優先權，一旦艾達古拿喺德甲冒起，打法成熟啱用，皇馬就有權回購球員，為將來挖角留條後路。
