奧拿拿又「派膠」　英國神童：還我迪基亞！

曼聯換帥後表現仍未穩定，其中門將奧拿拿再現「神經刀」本色，繼上場聯賽對諾定咸森林犯錯累輸波後，歐霸盃對柏辛域陀尼亞又「派膠」送畀對手入波，連英國飛鏢神童兼死忠曼迷Luke Littler都忍唔住高呼：還我迪基亞！

下半場開波仲係0比0嘅時候，奧拿拿後場組織交波畀馬菲斯迪歷特，但被對手截到並造成入球，好在曼聯最終反敗為勝。英國飛鏢神童Luke Littler隨即喺社交網表示：「還我迪基亞！」英國《BBC》統計顯示，西班牙門將迪基亞今季加盟費倫天拿後，14場賽事有7場不失球，80%撲救成功率更勝奧拿拿(67.1%)。

雖然奧拿拿連續2場犯下嚴重錯誤，不過隊長般奴費南迪斯賽後仍然力撐：「當問題出現，我哋唔會只係怪一個人，我哋對奧拿拿好有信心，佢知道自己犯錯，因為佢好聰明，而且會繼續幫助球隊。犯錯係足球一部份，如果冇人犯錯，比賽就唔會有入球啦！」