力拒曼聯國米挖角　拿玻里將同鋼門續約

拿玻里門將阿歷斯美列特將於明夏約滿，屆時可自由身走人，早前傳出兩大豪門曼聯及國際米蘭都有意簽入呢位27歲意大利國腳，觸動拿玻里管理層神經，出手向美列特開出新合約，預料雙方將會續約至2028年6月。

身高1米90嘅阿歷斯美列特已經效力拿玻里6年，近3季成為主力，並有份為意大利參加近2屆歐國盃，把關能力可靠，加上只剩下半年合約，因而成為曼聯及國際米蘭招攬目標。

尤其是國米現時正選門將恩尼森馬年屆36歲，教練施蒙尼恩沙基渴望簽入阿歷斯美列特作為新1號門將。拿玻里方面當然唔想免費益宿敵，意大利傳媒指會方迅速作出反應，準備同美列特續約，估計雙方可於月底前達成協議。

有人歡喜有人愁，今季由羅馬轉投拿玻里嘅左後衞史賓亞蘇拿不受重用，提出下月轉會市場重開後離隊，據悉西甲球隊貝迪斯有意簽入呢位31歲意大利國腳，亦有傳佢可能去沙特阿拉伯搵食。