曼城先聲奪人　「屠魔Goal手」當選總統

曼城將於周一(16日)凌晨英超「曼市打吡」主場迎戰曼聯，賽前「藍月亮」先聲奪人，名宿卡韋拉什維利當選格魯吉亞總統，或者可以為球隊「沖喜」。

格魯吉亞中央選舉委員會周六(14日)宣布，現年53歲嘅卡韋拉什維利當選新一任總統。資深球迷對於呢位一代射手，並唔陌生，因為佢曾於1995至97年效力曼城，並喺1996年4月對曼聯，射入1球，但曼城仍然輸2比3，該季更加降班收場。

卡韋拉什維利效力曼城期間總共上陣28場射入3球，離開「藍月亮」之後，去咗瑞士搵食。由於卡韋拉什維利當時射入曼聯大門，佢今次當選格魯吉亞總統，唔少網民認為係曼城贏波「吉兆」。