東網電視
更多新聞短片
安察洛堤足球生涯獲獎無數。
皇家馬德里周四(19日)贏得洲際盃冠軍後，教練安察洛堤歷來為「銀河艦隊」贏得15個冠軍，超越傳奇名帥蒙奴斯(14冠)，成為皇馬史上最成功嘅教練！
安察洛堤兩度執教皇馬(2013-15、2021至今)，成績都非常彪炳，今年狂擸歐聯、西甲、西超盃、歐超盃同洲際盃5冠後，累積為皇馬贏得15個冠軍，超越蒙奴斯喺1960年至74年間，為皇馬贏14個冠軍嘅球會紀錄。
安察洛堤嘅15個冠軍，包括3次歐聯、3次歐超盃、2次世冠盃、2次西甲、2次西盃、2次西超盃同1次洲際盃，呢位65歲教頭賽後簡單表示：「我好開心創造歷史，呢個係一個好大嘅成就。」
皇馬球星亦向教練送上祝賀，雲尼斯奧斯祖利亞表示：「恭喜波士！佢值得擁有，佢畀球員自由，係完美教練。」費達歷高華維迪亦話：「教練已經贏盡所有，佢領導我哋前進，所有嘢都係佢應得。」
