曼城衰退之迷解開　兩位英人成戰犯

曼城今季成績急速下滑，普遍輿論認為中場洛迪卡斯簡迪受傷長抖係主因，但英國傳媒近期發現，2位主力菲爾科頓、基爾獲加表現嚴重走樣，先至係「藍月亮」隕落致命傷。

菲爾科頓上季英超上陣35場合共創造27球，包括射入19球及8次助攻，換言之曼城上季聯賽96個入波有近28%同佢有關。不過，呢位24歲英格蘭國腳今季英超11次披甲都食白果，根據《whoscore》統計，今季英超射門超過20次嘅球員之中，菲爾科頓只有12.5%射中目標，屬於各人之中最低，難怪一直未開齋，令曼城攻力受削。

至於34歲防線老將基爾獲加狀態亦大不如前，佢擔任正選嘅比賽，曼城只有20%勝出率，反觀佢做後備，勝出率達69%，被指係球隊最大負累。加上基爾獲加不時爆出私生活負面消息，令人質疑佢冇資格擔任隊長。

由於菲爾科頓、基爾獲加都係領隊哥迪奧拿嘅愛將，相信唔會棄用兩人，但若然繼續重用呢兩位英格蘭國腳，恐怕「藍月亮」難以翻身。