伊巴謙莫域搭路　AC米蘭想借拉舒福特

曼聯前鋒拉舒福特嘅「轉會劇」又有新發展，據報意甲勁旅AC米蘭有意提出借用，而負責「搭路」嘅就係前曼聯球星伊巴謙莫域，呢位AC米蘭顧問有望用兩人嘅交情，游說拉舒福特過檔。

英國《每日郵報》報道，AC米蘭今季入球能力不足，球會顧問伊巴謙莫域目標係喺1月引入新前鋒，佢就打前曼聯隊友拉舒福特主意，並準備提出先借用半季，夏天再「強制性」買斷。

據報拉舒福特首選係去西甲，不過目前冇呢個機會，而伊巴謙莫域就可以大打「友情牌」，兩人曾經喺2016至2018球季合作，「福仔」之前亦表示：「伊巴謙莫域對我幫助好大，佢嘅意志係我見過球員中最強大，佢從來唔理其他人點樣講佢，喺心態上，佢對我嘅發展非常重要。」