東網電視
更多新聞短片
祖奧菲歷斯今季英超合共只上陣357分鐘。(Getty Images)
AC米蘭上場意甲0比2不敵祖雲達斯之後，爭入聯賽前4位形勢告急，新帥沙治奧干斯卡奧希望增兵提升實力，除咗準備簽入曼城後衞基爾獲加之外，亦計劃向車路士借用前鋒祖奧菲歷斯，拍住拉菲爾利亞奧，組成葡萄牙鋒線。
AC米蘭2位射手艾華路莫拉達、譚美阿巴謙表現平庸，莫拉達近期更加受傷，往往要靠中場雷恩達斯、翼鋒基斯甸普列錫入波，沙治奧干斯卡奧認為需要簽入前鋒，並睇中祖奧菲歷斯，好大程度上因為兩人屬於葡萄牙同胞，干斯卡奧非常了解呢位25歲「新C朗」實力，相信佢可以提升A米攻力。
加上祖奧菲歷斯同A米左翼拉菲爾利亞奧係葡萄牙國家隊隊友，早已建立默契，有助佢迅速融入球隊。
祖奧菲歷斯上年8月正式由馬體會轉投車路士，但被領隊馬利斯卡投閒置散，大多數時間只能踢盃賽，今季英超合共只上陣357分鐘，射入1球及1次助攻，車路士應該唔介意外借呢位「冗員」。
