東網電視
更多新聞短片
羅拔山齊士接高波甩手。
奧拿拿上場低級犯錯累曼聯輸波，賽後受到球迷口誅筆伐，估唔到車路士門將羅拔山齊士周二(21日)重蹈覆轍，接波甩手送畀狼隊1個入波，而佢今季失誤導致失球次數，竟然「超越」奧拿拿，連利物浦名宿加歷查都寸佢係「下游門將」。
羅拔山齊士喺完半場前接角球甩手，被馬特杜靴迪門前執雞射入，呢球係佢今季第4次「失誤導致失球」，全英超只有葉士域治嘅艾利真歷梅歷治更「醜」(5次)，曼聯門將奧拿拿「只有」3次排第3位。加歷查表示：「當時已經係補時，山齊士用手槌打就個波就得，對手亦冇犯規，我哋知道佢係英超門將，但可能只適合踢下游球隊，唔係前列份子。」
對於羅拔山齊士今季第4次犯錯累失波，領隊馬利斯卡就繼續力撐：「4次導致失波？咁有冇統計佢拯救球隊次數？我諗應該多過4次。冇問題，山齊士會犯錯，正如前鋒、中場、後防都會犯錯，山齊士表現一直好好。」
