東網電視
更多新聞短片
奧利華曾8次向阿仙奴球員出示紅牌。(Getty Images)
周六(25日)英超賽事，阿仙奴再次遇上「剋星球證」奧利華，上半場一次爭議判決下被逼10人應戰，不過對手下半場都有球員被逐，最後10個對10個之下，阿仙奴作客1比0險勝狼隊，繼續穩守第2位。
阿仙奴今場同狼隊勢均力敵，43分鐘出現爭議一幕，狼隊防守角球後展開反攻，阿仙奴小將利維斯史基利從旁踢跌馬特杜靴迪阻止快攻，當全世界以為「食硬黃牌」，奧利華竟直接出示紅牌。
統計顯示，奧利華歷來8次向阿仙奴球員出示紅牌，係佢趕出多球員出場嘅一隊，今季季初阿仙奴作客曼城，奧利華亦曾爭議性將李安度杜沙特趕走。
阿仙奴踢少個照樣主進，70分鐘狼隊中場祖奧高美斯粗野犯規，兩黃一紅被逐，10個對10個之下阿仙奴即刻入波，卡拉費奧利左路抽入死角，助阿仙奴驚險拎晒3分。
阿仙奴領隊阿迪達賽後表示：「我好嬲，但判斷留番畀大家，因為(誤判)實在太明顯，會唔會上訴由球會決定，或者我哋根本唔需要上訴(等足總主動撤銷紅牌)。」
