東網電視
更多新聞短片
芝維爾(左)、阿素迪沙斯(中)、祖奧菲歷斯(右)被車路士外借。
相比起曼城、熱刺喺冬季轉會窗市場關前一刻再度增兵，另一支英超豪門車路士反其道而行，進行大清貨，再有3位球員離隊，包括前鋒祖奧菲歷斯、中堅阿素迪沙斯、左後衞芝維爾。車路士今個冬季總共有7位一隊球員執包袱。
車路士最新3位離隊球員，都係以外借形式轉會，阿素迪沙斯轉投阿士東維拉，獲得500萬鎊(約4,840萬港元)借用費，至於芝維爾轉投水晶宮，呢位28歲英格蘭國腳近年經常受傷患問題困擾，會方早已打算放棄佢，但一直冇買家接貨，依家由另一支倫敦球隊水晶宮借用，總算甩到手。
此外，車路士上年夏天向馬體會收購祖奧菲歷斯，但呢位葡萄牙國腳不獲重用，傳出多支球隊對佢有興趣，最終外借去AC米蘭。車路士早前已將另1位葡萄牙國腳連拿度維加外借去祖雲達斯，以及出售中場卡沙迪畀拖連奴，呢3位「車手」將會喺意甲碰頭。
