東網電視
更多新聞短片
安歷基(左)、夏基美(中)、域天拿(右二)、紐奴文迪斯(右)一齊續約。
1/2
巴黎聖日耳門(PSG)正式宣布同教練安歷基，以及3位主將夏基美、域天拿、紐奴文迪斯續約，既可以穩定軍心，同時避免重演基利安麥巴比上年夏天自由身走人，造成球會人財兩失事件。
PSG今季成績出色，周六(8日)凌晨法甲憑域天拿、基華拉斯基利亞各入1球，加上奧士文尼迪比利梅開二度，主場以4比1大勝摩納哥之後，踢21場聯賽取得16勝5和，拋離踢少1場嘅第2位馬賽13分，亦係今季歐洲5大聯賽唯一不敗球隊，主帥安歷基獲得續約至2027年6月絕對合理。
至於中場域天拿、右後衞夏基美、左後衞紐奴文迪斯同樣續約至2029年6月，早前曾傳出曼聯有意收購紐奴文迪斯，現時可以死心。
另外，PSG亦同3位小將續約，當中18歲後衞艾漢拿治、17歲前鋒伊巴謙麥巴耶續約至2027年，18歲右閘約林薩古伊續約至2028年。
艾漢拿治(左)、伊巴謙麥巴耶(中)、約林薩古伊(右)一齊續約。
