東網電視
更多新聞短片
威廉沙列巴成皇馬獵物。(Getty Images)
皇家馬德里今季後防傷患不斷，而且主力年紀偏大，夏天換班勢在必行。法國媒體《RMC Sport》報道，皇馬已鎖定英超2位「最佳中堅」為目標，其中阿仙奴嘅法國國腳威廉沙列巴係頭號獵物，皇馬更不惜出破後衞轉會費紀錄天價去收購，志在必得！
巴西中堅艾達米列達奧近年連番重傷，魯迪格已經31歲，阿拉巴就32歲，皇馬希望買頂級中堅係當務之急，只得23歲嘅沙列巴被譽為世界最佳中堅之一，當然啱晒心水，不過阿仙奴唔會輕易放人，據報皇馬將會動用天價去搶，收購價會超越曼聯8,000萬鎊買哈利馬古尼嘅世界紀錄。
若果收購沙列巴唔成事，利物浦中堅華基爾雲迪積克(VVD)會係另一目標，雖然已經33歲嘅VVD只係「短炒」方案，但佢夏天會回復自由身，免費獲得最強嘅即戰力非常吸引，尤其另一利物浦守將阿歷山大阿諾特，盛傳亦會以自由身加盟皇馬，「打包」簽約百利而無一害。
