東網電視
更多新聞短片
格連活特(右)今季踢22場法甲入14球。
周日(16日)凌晨法甲，馬賽主場以5比1大勝聖伊天，格連活特射入1球12碼，成為自2004年杜奧巴之後，近21年以來首位踢22場法甲入到14球嘅馬賽球員，演出光芒四射。
馬賽今仗佔盡上風，前鋒高爾尼梅開二度，格連活特、米高梅里路、拉比奧特各建一功，一度領先5球。聖伊天踢到比賽後段，靠盧卡斯史達辛入波破蛋，連續6場聯賽不勝排尾三。
至於馬賽取得3連勝，格連活特近6次聯賽上陣入4球，以14個入波排射手榜第2位，僅次於入16球嘅巴黎聖日耳門翼鋒奧士文尼迪比利。
榜首巴黎聖日耳門憑中場法比安彭拿入波，作客以1比0擊敗圖盧茲，繼續領先第2位馬賽10分。
另外，第3位摩納哥主場以7比1大勝南特，前鋒米卡比亞利夫上演「帽子戲法」入3球，呢位22歲丹麥新星上月由奧地利球隊格拉茨轉投摩納哥之後，踢5場法甲入7球，成為自2012年伊巴謙莫域之後，第1位踢首5場法甲入到7球嘅球員。
