東網電視
更多新聞短片
奧比馬田開始上位。(Getty Images)
曼聯上場英超對愛華頓，落後2球劣勢之下，最後逼和2比2，17歲小將奧比馬田入替海倫，成為轉捩點。呢位新星上陣後，紅魔鬼就連入2球，認真好腳頭，反觀同屬丹麥人嘅海倫表現一無是處，恐怕未來賽事正選不保。
海倫今場成為「五無」球員，0入波、0射門、0助攻、0過人，8次同對手對抗，全部失敗。呢位丹麥國腳踢咗70分鐘，只有12次觸球，猶如隱形。
曼聯領隊魯賓艾摩廉忍無可忍，寧願用之前僅1次英超上陣經驗嘅奧比馬田入替海倫，奧比馬田上陣僅10分鐘，曼聯就由般奴費南迪斯、曼紐爾烏加迪各入1球扳平。
賽後唔少網民嘲諷海倫身為前鋒，但其實係球隊進攻最大絆腳石，連1位17歲小將都好過佢，呼籲魯賓艾摩廉唔好再畀海倫踢正選。
至於奧比馬田今季由阿仙奴青年軍加盟曼聯，早前對熱刺補時入替卡斯米路，首嘗英超比賽滋味，今場有20分鐘發揮空間，曼聯缺乏可靠射手情況下，呢位丹麥小國腳應該會有愈來愈多上陣機會。
