東網電視
更多新聞短片
阿歷山大索洛夫對巴塞特別醒神。(Getty Images)
周三(26日)凌晨西盃4強首回合，上演峰迴路轉嘅入球Show！巴塞隆拿先輸2球後，一度連轟4球反勝，但最後階段突然崩潰，最終主場同馬德里體育會踢成4比4，次回合作客形勢凶險。
巴塞今場開局夢遊，1分鐘就被祖利安艾華利斯攻陷，6分鐘再被基沙文入多球。如夢初醒嘅巴塞之後大反擊，柏迪19分鐘先追1球，一對中堅古巴斯同恩尼高馬天尼斯分別喺角球頂入，半場反超前3比2。
氣勢如虹嘅巴塞74分鐘再有羅拔利雲度夫斯基入波，以為大局已定，馬體會84分鐘靠馬高斯洛蘭迪追番1球，後備上陣嘅阿歷山大索洛夫再喺補時3分鐘近門射入，追成4比4完場。
挪威前鋒索洛夫堪稱係「巴塞剋星」，連埋之前效力皇家蘇斯達同維拉利爾，佢近5次對住巴塞都有入波，近3次都喺90分鐘後建功，包括季初聯賽補時「絕殺」贏2比1。
巴塞教練費歷克賽後表示：「我為球隊感到自豪，但亦要傾傾失球嘅問題，我哋係支年輕球隊，今場證明球隊仲有好大進步空間，我哋會全力以赴。」
