東網電視
更多新聞短片
湯馬士蘇錫克30歲生日收大禮。(Getty Images)
周五(28日)凌晨英超賽事，韋斯咸喺主場2比0輕鬆擊敗李斯特城，進一步逃離降班漩渦。捷克中場湯馬士蘇錫克今場先開紀錄，慶祝佢30歲生日之餘，仲打造英超「另類紀錄」。
韋斯咸今場圍攻李斯特城，21分鐘門前混戰，今場30歲生日嘅湯馬士蘇錫克龍門口「執雞」領先；43分鐘客隊中堅維斯達加特擺烏龍，令韋斯咸順利贏2比0完場。
湯馬士蘇錫克喺3年前27歲生日正日，亦喺對狼隊一箭定江山，係英超史上第2個兩次喺生日入波嘅球員，追平舒寧咸喺1994年同1995年創下嘅「生日紀錄」。
湯馬士蘇錫克賽後表示：「好正嘅生日！我只係想贏波，入埋波就更加好，呢份係好好嘅禮物。唔好忘記艾路拿嘅『零封』，我哋依家可以慶祝。」門將艾路拿係今場另一「壽星公」，佢今場度過32歲生日。
