東網電視
更多新聞短片
艾斯高今場搶晒鏡。
皇家馬德里喺西甲爭標再受打擊！周日(2日)凌晨西甲大戰，近況勇猛嘅貝迪斯有老將艾斯高1傳1射，加上安東尼馬菲奧斯精彩表現，喺先落後下以2比1反勝皇馬。艾斯高入波後走去場邊同老婆深情擁吻，成為最佳男主角。
皇馬喺10分鐘由巴謙戴亞斯入波領先，不過貝迪斯愈戰愈戰，34分鐘艾斯高開出角球，莊尼卡度素頂入追平；54分鐘艾斯高交出致命出線，造就捷西斯洛迪古斯博到12碼，艾斯高操刀射入致勝球後，即走去場邊同老婆激吻，相當溫馨。
艾斯高今場倒戈皇馬交出1射1傳，佢賽後表示：「今場我老婆都有入場，我依家拍緊一部關於我受傷後復出嘅紀錄片，我亦要為呢個慶祝向皇馬球迷道歉，係皇馬令我實現兒時夢想，佢永遠喺我個心入面。」
艾斯高季初因斷腳缺陣，但上年12月復出後，11場聯賽有5入波同2助攻，表現出色。除艾斯高之外，巴西翼鋒安東尼今場雖冇直接入球貢獻，但有2次關鍵傳球同全場最高6次搶截，表現大獲好評，佢賽後亦拍片豪言：「我嘅巔峰由依家開始！」
