東網電視
更多新聞短片
馬菲奧斯根夏忽然「跳掣」。
周六(1日)英格蘭足總盃第5圈賽事，狼隊前鋒馬菲奧斯根夏由英雄變「狗熊」，作客般尼茅夫一仗，佢射入世界波幫球隊追平，但最後階段忽然「跳掣」，向對手拳打腳踢兼頭撞，結果被紅牌驅逐，狼隊最終喺互射12碼輸4比5出局。
般尼茅夫上半場由法蘭斯高艾雲尼臣入波領先，根夏60分鐘回敬一個世界波追平，兩隊踢到加時都再冇入波，但踢到加時最後階段，根夏同米路斯卻基斯爭波推撞，失控嘅根夏先打對方一拳，卻基斯倒地後又加一腳，等對方企返起身，根夏再用額頭撞對方一下，「3連擊」下自然難逃紅牌，狼隊最後亦射輸12碼出局。
今季已入15球嘅根夏，今場「暴力犯規」食紅按例停賽3場，但佢上年12月已曾喺對葉士域治同保安衝突被罰停賽2場，加上今次紅牌嘅嚴重性，呢位巴西前鋒好大機會被追加更長停賽。根夏賽後亦知衰道歉：「我嘅隊友再一次交出最大努力，我最後唔應該失去理智，好對唔住！」
