東網電視
更多新聞短片
奧比馬田可以專心踢英超。(Getty Images)
曼聯喺英足盃出局後，歐霸盃成為今季唯一爭冠希望，不過近期火速上位嘅前鋒奧比馬田，竟然因為未有喺歐霸名單註冊，今屆餘下賽事都唔可以上陣，想贏歐霸盃就要寄望正陷18場入球荒嘅海倫生性。
丹麥前鋒海倫對上一次入波已經係上年12月，領隊魯賓艾摩廉都頂唔順，近期開始提拔小將奧比馬田，上場英足盃對富咸，奧比馬田上陣52分鐘有3次黃金機會，同海倫今季22場英超嘅次數睇齊，足見奧比馬田嘅侵略性更強。
正當球迷呼籲奧比馬田「擔正」，點知英國傳媒證實，17歲嘅奧比馬田原來並冇註冊，就連青年軍「B名單」都冇份，即係今屆都唔可以上陣。曼聯喺冬季曾經修改歐霸盃名單，同樣由阿仙奴過檔，但更遲加盟嘅艾登希雲都有註冊，但奧比馬田當時並唔喺一隊，而佢亦因為加盟不足2年唔符合「B名單」資格，結果緣盡今屆歐霸盃。
