東網電視
更多新聞短片
港超聯：東方 vs 冠忠南區
收看直播，請按直播ICON，或按下面鏈結：
旺角大球場周三（5日）晚上舉行1場「中銀人壽香港超級聯賽」第9周補賽，東方主場迎戰冠忠南區。東方本季各項賽事面對南區3戰全勝，且看今仗能否把握對方受傷停困擾，延續「食硬」走勢。（港台電視32、on.cc東網周三晚上8時同步直播）
東方今季在聯賽及「高級組銀牌」先後與南區交手3次，錄得全勝，但主教練盧比度（Chino）未感樂觀：「雖然Clement（賓紀文）狀態可以再好啲，但佢加盟絕對幫到手，不過始終我哋啱先踢完『足總盃』，周中即刻要對南區，點都有啲吃力，所以今場絕對唔易啃。」壞消息是巴杜姆早前對理文的聯賽領紅被「加監」，是役需要停賽。
至於射手巴科爾（Noah）形容南區踢法硬朗，勢必給予他和隊友極大麻煩：「南區班球員夠晒硬淨，每次都好辛苦先贏到佢哋，不過我哋全隊默契好好，就算做少少輪換，效果唔會差太遠，希望順利贏波。」
南區方面，日前在「冠忠巴士六十週年足總盃」8強倒灶不敵港會，領隊貝可泓承認士氣難免有影響，但他有信心球隊能及時反彈，全力搶分：「雖然對住東方有啲被『格食格』，但我哋今季好多時對住強隊，都有唔錯表現，希望大家盡快收拾心情，踢好今場先。」陣容方面，翟廷峯累積5黃，宋柱浩亦被指早前對北區一役，刻意取黃牌被追加1場停賽，兩人是役未能候命，另門將伍瑋謙有傷在身，上陣成疑。
黎格爾則提到東方經常放過頭波製造埋門，呼籲隊友小心提防：「東方好鍾意放長波畀巴科爾，再執Second Ball埋門，所以大家拍波要埋啲，唔可以畀太多空位佢哋，而且佢哋都係踢完『足總盃』冇耐，相信我哋體力唔會太蝕章。」
【兩隊預計正選陣容】
東方
門將：1.葉鴻輝
後衞：17.賓紀文 72.拿亞 6.米祖域 20.卡路士 19.亞歷斯祖
中場：16.梁振邦 27.馬高斯 23.馬希偉
前鋒：10.費利浦薩 7.巴科爾
冠忠南區
門將：31.顏翱天
後衞：4.川瀨浩太 6.基斯 21.黃浩然
中場：8.李嘉耀 10.亞哥斯達 15.黎格爾 26.陳凱柏
前鋒：11.佐佐木周 9.基哥利 90.積遜
