東網電視
更多新聞短片
紐亞慶祝期間受傷。
周四(6日)凌晨歐聯16強「德甲內戰」，拜仁慕尼黑首回合主場3比0大炒利華古遜，半隻腳踩入8強。拜仁今場贏得漂亮，不過門將紐亞似乎High過頭，慶祝入波嗰陣竟然拉傷小腿，搞到要提早退下火線，有可能面臨長時間休戰。
拜仁今場非常進取，哈利卡尼9分鐘先開紀錄，54分鐘穆斯亞拿拉開到2比0，不過隊長紐亞想跑去同隊友慶祝嗰陣，唔小心拉傷小腿，要由後備門將烏列比入替。拜仁表現未受影響，客隊62分鐘仲有洛迪梅基尼食紅牌，踢多個嘅拜仁喺75分鐘再由哈利卡尼射入12碼，最終大勝3比0。哈利卡尼今場梅開二度，今季各項賽事累積30球，加盟拜仁2季入波都達到30大關。
拜仁教練高柏尼賽後透露：「紐亞慶祝嗰陣整傷自己，依家唔知咩情況，我哋今季都試過有哈利卡尼、穆斯亞拿等主將受傷，球隊有足夠人才可以應付問題。」38歲嘅紐亞賽後就喺社交網留言：「我本來想喺自己第150場歐聯踢更長時間，不過我為球隊表現感到自豪，依家只係第1步，加油！」
