東網電視
更多新聞短片
高普唔想做「黑腳」。(Getty Images)
利物浦今季好大機會再奪英超冠軍，前主帥高普會否現身係利迷關注焦點，高普近日表示，已計劃好5月底重返晏菲路睇利物浦主場對水晶宮嘅聯賽煞科戰，不過先決條件係利物浦到時已經提早封王。
高普去年5月離開利物浦，留下一個超強陣容畀繼任者施洛，「紅軍」今季表現勢如破竹，大有機會繼2019至20球季後再奪英超冠軍，唔少利迷都認為高普都有功勞，希望佢會喺奪冠派對現身。
對於利物浦奪冠機會，高普坦言唔想做「黑腳」：「我唔想講太多嘢，因為我唔想做『烏鴉口』。」但佢表示已有計劃會去睇利物浦對水晶宮嘅聯賽煞科戰，但前題係到時已經提早封王。
利物浦已經book定巴士搞勝利巡遊，高普表示到時唔會登上巴士，只會企喺人群堆中默默慶祝。2019至20球季利物浦奪得聯賽冠軍，但因為當時新冠疫情爆發，無法舉辦巴士巡遊同奪冠派對，利迷希望今次高普能夠出席，一齊慶祝。
